Fjölbreyttar áskoranir einkenndu rekstur embættisins árið 2024. Markmið um markvissa fjármálastjórn og bætta nýtingu fjármuna voru áfram höfð að leiðarljósi, en ekki var alltaf auðvelt að ná þeim markmiðum. Nokkrir ófyrirséðir þættir settu mark sitt á reksturinn og reyndu á sveigjanleika og útsjónarsemi í fjármálastýringu Lögreglunnar á höfuðborgarsvæðinu. Í ársbyrjun var uppsafnaður afgangur embættisins 163 m.kr. og gerði rekstraráætlun ársins ráð fyrir að nýta þann afgang á árinu, meðal annars til að mæta aðhaldskröfu í fjárlögum upp á 67 m.kr. Möguleikinn á flutningi fjárheimilda hefur gagnast embættinu vel til að byggja upp ábyrga rekstrarvitund hjá stjórnendum deilda og búa í haginn fyrir tímabil þegar þrengir að.

Ánægjuleg og óvænt breyting varð í rekstrinum þegar embættið hlaut einskiptis styrkingu vegna íþyngjandi kostnaðarauka sem hlotist hafði af mótmælum undanfarin misseri. Sú styrking breytti rekstrarstöðu ársins verulega á þann veg að uppsafnaður afgangur frá fyrri árum mun nýtast embættinu lengur en gert var ráð fyrir. Sérstök verkefni settu einnig mark sitt á starfsárið. Þar má nefna aukna áherslu á eftirlit með sjólandamærum, sem kallað hefur á sérstakan mannafla, skipulag og sérfjárveitingu.  Þá kom einnig til framkvæmda fjölmennt Norðurlandaráðsþing, sem krafðist sérstakra öryggisráðstafana og viðveru lögreglumanna, með tilheyrandi kostnaði.

Á árinu gerði Ríkisendurskoðun forkönnun á starfsemi embættisins til að meta hvort tilefni væri til frekari stjórnsýsluúttektar. Forkönnunin beindist einkum að fjórum lykilþáttum: Mannauðsmálum, málsmeðferðartíma, innra eftirliti og innri endurskoðun. Niðurstaðan, sem barst embættinu í minnisblaði sendu til Alþingis, var að ekki væri tilefni til slíkrar úttektar að svo stöddu. Í minnisblaðinu komu fram ýmsar gagnlegar ábendingar sem verða nýttar til umbóta í starfsemi Lögreglunnar á höfuðborgarsvæðinu. Sérstaklega ánægjulegt var að fá staðfestingu frá Ríkisendurskoðun á þeirri þróun sem embættið hefur lengi bent á varðandi fjölda lögreglumanna á höfuðborgarsvæðinu. Samkvæmt úttektinni er fjöldi lögreglumanna á höfuðborgarsvæðinu um 1,2 á hverja þúsund íbúa, samanborið við 2-3 í höfuðborgum samanburðarríkja Íslands. Jafnframt staðfestir Ríkisendurskoðun að frá sameiningu lögregluembætta á höfuðborgarsvæðinu hafi lögreglumönnum fækkað um 12,4% á sama tíma og lögreglumönnum á landinu öllu hefur fjölgað um 11,3%. Þetta styður við þau sjónarmið sem embættið hefur ítrekað sett fram um nauðsyn þess að efla lögregluna á höfuðborgarsvæðinu.

Meðal ábendinga Ríkisendurskoðunar var mikilvægi þess að hlúa að starfsumhverfi og starfsánægju lögreglumanna, m.a. til að stemma stigu við brotthvarfi úr stéttinni, sem er í takt við áherslur embættisins í mannauðsmálum undanfarin misseri. Einnig var lögð áhersla á að halda áfram að þróa aðferðir til að mæla og fylgjast með málsmeðferðarhraða, sem er þáttur sem embættinu er umhugað um að bæta. Þetta samræmist vinnu sem þegar er hafin með þróun mælaborða og annarra verkfæra til að fylgjast með framgangi mála.

Launakostnaður hélt áfram að vega þyngst í rekstri Lögreglunnar á höfuðborgarsvæðinu og var um 85% af heildarkostnaði, sem er töluvert hærra hlutfall en hjá mörgum öðrum ríkisstofnunum. Í ljósi þess var mikilvægt að stýra mannafla og verkefnum á sem hagkvæmastan hátt. Áfram var unnið að nýsköpun og umbótum í rekstrinum. Áhersla var lögð á stafrænar lausnir og endurnýjun tækjabúnaðar til að tryggja að lögreglan hefði yfir að ráða nýjustu tækni og búnaði. Slíkar fjárfestingar eru mikilvægar til að tryggja skilvirkni og öfluga löggæslu til frambúðar.

Samkvæmt ársreikningi fyrir árið 2024 var ársveltan 8.441,7 m.kr. og afkoma neikvæð um 13,4 m.kr. Þá var hrein eign embættisins 149,6 m.kr. í árslok samkvæmt efnahagsreikningi og eignir samtals 2.083,7 m.kr. Ársreikninga Lögreglunnar á höfuðborgarsvæðinu er að finna á slóðinni https://arsreikningar.rikisreikningur.is/

Útgefandi:
Lögreglustjórinn á höfuðborgarsvæðinu

Umsjón og ábyrgð:
Upplýsinga-og áætlanadeild, Gunnar Rúnar Sveinbjörnsson

Myndir: Magdalena Lukasiak